ফটাঢোল

ফটা-ঢোলৰ আপদীয়া পদ্য – খগেশ সেন ডেকা

চাহাবগণে আনিছিল বৰবিহ কানি
গাঁও-ভূঁই চহৰ-নগৰ ধৰিছিল চানি
চাহাবহঁতৰ আন জাত
নিজৰ ৰজাৰ একে বাট
দেশীবিধ খালে হেনো নহয় একো হানি ৷

ছয় বছৰীয়া যুঁজখন ধোঁৱাচাঙত তুলি
নেতাবোৰ ৰজা হ’ল উৰাই বাটৰ ধূলি
গছত কঠাল ওঁঠত তেল
ৰাজনীতিৰ পাশা খেল
বিয়াগোম গোল্লা এটা হাতে লোৱা তুলি ৷

পাশাখেলত এক্সপাৰ্ট শকুনি মোমাই
ঘৰ্মঘণ্ট লগাই ফুৰে কোনে পাত্তা পায়
দুৰ্যোধন ঘিটিৰাই
নুবুজিলে বপুৰাই
ৰজা হোৱাৰ বাসনাত সবে হেৰুৱায় ৷

হাতীৰ পিঠিত অগপ দিশপুৰলৈ যায়
অসমীয়া প্ৰজাসৱে ফিৰি ফিৰি চায়
একেই বাঁহৰ কাকৈ
ভলুকা বাঁহৰ জাকৈ
হাত আৰু পদুমত মুখ থেকেচা খায় ৷

ক’ত আছে ফটা ঢোল লাগে এটি মোক
কোবাই ধুবাই আনিমগৈ নতুন বিহুৰ চোক
হাতে তুলি মাৰিডাল
হাত চাপৰি আৰু তাল
অৱতৰত দি যাম চূণৰ মুখত জোক ৷

তলপাকে হাত মেলি ঘটে ধন বিত
আই-বোপাইৰ কাহানিও নুবুজিলে চিত
বৰ্খাস্তৰ নিউজ
পাই হ’ল ফিউজ
ঘৈণীয়েকে পেপাৰ চায় কোন চিনেমা হিট ৷

কৈ মৰে মানুহ আৰু ৰৈ মৰে চৰাই
কাকো কোনেও আজিকালি নকৰে পৰাই
আহি আছে অচ্ছে দিন
ফাটত লগাই চেফটি পিন
ফটা ঢোলেও পাব পাৰে হাজেলীয়া শৰাই ৷

ফিচ ৰামী বাম্পাৰ তিনি পাট্টি ফ্লাছ্
ৰাতি দিনে চলি থাকে তাচপাতৰ ক্লাছ্
দিয়ে ব্লাইণ্ড হিট্
শ্ব’ত নহয় মিট্
ইচকাপনৰ মেমটো দেখি হাতে তোলে গ্লাছ্ ৷

☆★☆★☆

One comment

Leave a Reply

Your email address will not be published. Required fields are marked *