স্নেপশ্বট – ১

ওচৰ চুবুৰীয়া কেইজনক ক’লো, বোলো এইবাৰ মাঘ বিহুত মেজিৰ লগতে ভেলাঘৰ এটাকে সাজো আহক৷ কলিতাই বোলে, মেজি বনাবলৈ খৰিৰ কুইন্টল ছশ টকা আৰু ভেলাঘৰ সাজিবলৈ নৰা ক’ত পাবাহে? আজি কালি মডাৰ্ণ ফেচনত লেডিজ কাপোৰ দিনে দিনে চুটি হোৱাৰ দৰে হাইব্ৰীড ধান সোপাও চুটি চাপৰ৷ তাতে মালিকে মাটিত কাঁচি লগাই কাটে আৰু পথাৰতে মেচিনৰে মাৰি তাতেই বিক্ৰী কৰে আৰু বাঁহৰ যিহে দাম, তাতকৈ বৰুৱাৰ গেৰেজটো ডাঙৰ, আহল বহল, তাতেই যোৱাবাৰৰ দৰে ৰাতি ভোজ খোৱাই ভাল হ’ব৷ হাজৰিকাই বোলে, মই আব্দুল আৰু খালেকক কৈছো টকা পোন্ধৰশ দিলে আঠ ফুট বাই দহ ফুট ভেলাঘৰ এটা সাজি দিব বোলে৷ আব্দুলক চিনি পাও, এইবাৰ দেৱালীত তাৰ পৰা দুজোপা কলগছ কিনিছিলোঁ৷ ঘৰত আহি পুতি মেলি দি থৈ গৈছিল৷ বৰ ভাল ল’ৰাটো৷ সকলোৱে বোলে পোন্ধৰশ বেছি নহয়, তাকেই অৰ্ডাৰটো দি দিয়ক৷ কন্ট্ৰেকটো দিবহে পালোঁ৷ মেজিকত ৰেডিমেড নৰাৰ বেৰ, চালি, খুঁটা লৈ আহি হাজিৰ৷ দত্তৰ ঘৰৰ পিছ চোতালত আধা ঘন্টাত ভেলাঘৰ ৰেডি।

স্নেপশ্বট – ২

উৰুকাৰ পুৱা। শ্ৰীমতীয়ে হাতত বজাৰৰ মোনা আৰু গাড়ীৰ চাবিটো দি বোলে ব’লা৷ মই বোলো ক’লৈ? এওঁ বোলে চিনেমা চাই আহোঁ৷ মই বোলো বজাৰৰ চটি বস্তাৰ মোনালৈ চিনেমা চাব যাবানে? তেওঁ বোলে তেনেহ’লে সুধিছা কেলেই? ব’লা, সোনকাল কৰা৷ মই বোলো হেৰা বজাৰহে যাবা, এই নতুন চাদৰখননো কেলই পিন্ধিলা লেতেৰা হ’ব৷ এওঁ বোলে নহয় ব’লা৷ মনতে ভাবিলোঁ সদায় কুৰ্টি পিন্ধি স্কুটি চলাই ফুৰা আই গোঁসানী আজি চাদৰ মেখেলা পিন্ধি মোৰ লগত বজাৰলৈ ওলাইছে, কথা কি! আকৌ সুধিলোঁ, হেৰা বজাৰৰ পৰা বাহিৰে বাহিৰে মন্দিৰ বা ক’ৰবাত সোমাবা নেকি? এওঁ বোলে হেই মাছৰ বজাৰৰ পৰা আহি কোনোবাই মন্দিৰত সোমাই নেকি? ব’লা মাছ কিনিম আৰু চিধা ঘৰ আহিম৷ অঁ তেতিয়াহে মোৰ ব্ৰেইনটোৱে মাত দিলে, অঁ বজাৰ নহয় আজি শ্ৰীমতীয়ে বজাৰত ডাঙৰ ডাঙৰ ৰৌ বৰালি চিতলৰ কাষত চেলফি উঠিব৷ মানে ফিলিং ভোগালী বজাৰ৷

স্নেপশ্বট – ৩

ডাঙৰ বৰালি দুটা দুহাতে দাঙি হনুমানে পাহাৰ দঙা দি দুটামান পজ দিলে, মই ক্লিকাই দিলোঁ ৷ দেখিলোঁ মোৰ দৰে ফটোগ্ৰাফাৰৰ বজাৰত ভিৰ লাগিছে৷ হওঁক, শ্ৰীমতীক বলিয়ামি নকৰিবা বুলি এনেই ক’লো৷ ফটো উঠি শ্ৰীমতীয়ে মাছ তাতে এৰি গাড়ীত৷ মই বোলো, হেৰা ইমান সোপা মাছৰ পিচ কোনে খাব? কোনে ভাজিব?

এওঁ বোলে, বাহিৰতে জুই অকন ধৰি অলপ পিছৰ পৰা ভজা আৰম্ভ কৰি দিবা, মই আজি নাভাজো, বৃহস্পতি বাৰ মোৰ ফাস্টিং৷ মোৰ চকু কপালত উঠোতেই যেনিবা তেওঁৰ এষাৰ কথাই মনটো ভাল লগাই দিলে বোলে, হাজৰিকাক মাতি দিবা আৰু লগত কিবা এটা লৈ ল’বা। মাছো ভজা হ’ব আৰু তোমালোকে চুৰকৈ কৰা কামটোও কৰা হ’ব৷ মইও বোলো পিছত দেৱী আইৰ ডিচিচন চেঞ্জ হোৱাৰ আগতেই হাজৰিকাক ফোন লগোৱাই ভাল৷

স্নেপশ্বট – ৪

ঘৰৰ যিমান কেইটা চাউণ্ড বক্স আছিল চব উলিয়াই জোৰা দিলোঁ, হনী সিঙৰ গান এটা লগাই অলপ দূৰ খোজ কাঢ়ি ওলাই গৈ শুনি আহিলোঁ ৷ গৈছে, চাউণ্ড বক্সৰ মাত প্ৰায় দহ পোন্ধৰ ঘৰ পাৰ হৈছে ৷ মনটো ভাল লাগিল৷ গান কোনে অকলে শুনে, গান হৈছে আনক শুনোৱা বস্তু৷ মানুহে শুনি ক’ব লাগিব যে শইকীয়াৰ বিহু লাগিছে, তেতিয়াহে৷ বিহুৰ দিনা যদি আনৰ টোপনিয়েই ক্ষতি নকৰোঁ, কিহৰ বিহু পাতিলোঁ৷ লগাই দিলোঁ বাপ্পেকে ইয়’ ইয়’ হনী সিং৷ কি গাইছে সিয়েই জানে আৰু হাজৰিকা মই মুঠতে ডেঞ্চ ৷

স্নেপশ্বট – ৫

হাজৰিকাই বোলে, খৰি শেষ মেজিটোকে জ্বলাই দিওঁ৷ মই বোলো, হেৰি হাজৰিকা পুৱা অগ্নি সেৱা ক’ত কৰিব। হাজৰিকাৰ পাচ নম্বৰ গিয়েৰ, মোৰ চাৰি নম্বৰ৷ মই পিক আপেই ল’ব পৰা নাছিলোঁ। বেটাই চাঞ্চ পাই মোক অভাৰটেক কৰি বুজাই দিলে বোলে,” অগ্নি ইচ অগ্নি৷ হোৱেদাৰ ইট ইচ মেজি অৰ গেচৰ স্টভ। আগতে বাফেল’ মিল্কৰ দৈ খাইছিলে পিছে এতিয়া পুৰৱী ডায়েৰিৰ দৈ৷ আগতে ঘৰত ঢেকীত পিঠা বনাইছিলে আৰু এতিয়া আত্ম সহায়ক গোটৰ পৰা কিনা পিঠাৰে বিহু৷ আগতে ঘৰত বিহুৱান বৈছিলে আৰু এতিয়া মাদ্ৰাছৰ পৰা অহা গামোছা৷ সকলো ৱানচ আপন এ টাইম হৈ গ’ল অ’ শইকীয়া৷ দুখ নকৰিব নাও ইটচ গেচৰ জামানা৷ উই হেভ টু প্ৰে গেচ দেৱতা৷ চ’ বাৰ্ন ডা মেজী।মৰ্নিং উই উইল প্ৰে অগ্নি দেৱতা ইন গেছৰ স্টভ৷ ক’বলেহে পালে, ৰাতি বাৰটাতে মেজি জ্বলাই দিলে বাপ্পেকে৷ মই মেজিৰ কেইডালমান খৰি চাইড কৰি থৈ দিলোঁ জুই পুৱাবলে ৷ সকলোৱে চিঞৰি উঠিল ” হেপ্পী বিহু”।

☆★☆★☆

Comments

  1. মনে মনে কামটো কৰিবলৈ পাৰমিচন যে দিলে, বচ বিহু হৈ গ’ল৷ তামাম!

Leave a Reply

Your email address will not be published. Required fields are marked *